Pumasa sa pangatlo at huling pagbasa ang panukala na layuning bawasan ang bilang ng mga Pilipinong walang trabaho sa pamamagitan ng pagtutugma ng kanilang edukasyon at kasanayan para sa mga job opportunity.

Pahayag ni Speaker Ferdinand Martin G. Romualdez, ang House Bill (HB) No. 7370 o ang “An Act creating a tripartite council to address unemployment, underemployment and the job-skills mismatch problem in the country, and appropriating funds therefor,” ay makakabuti para sa mga walang trabaho, mga estudyante sa kolehiyo, at iba pang mga estudyante.

Isang tripartite council ang itatatag upang tulungan ang mga Pilipino na itugma ang kanilang edukasyon at kakayahan sa mga trabaho at oportunidad sa hinaharap.

“Part of our unemployment problem is due to the fact that many of the new members of our labor force do not possess the competency employers are looking for. Their education and job requirements do not match. This is one of the problems we would like to address in approving the bill,” ayon kay Romualdez.

Isa sa pangunahing layunin ng panukala ay siguraduhin ang halaga at pag-aangkop ng kursong akademiko sa higher education curriculum at training programs sa technical-vocational institution kaugnay sa pangangailangan ng industriya ng bansa para sa pag-unlad ng ekonomiya.

Ang tripartite council sa ilalim ng panukala ay nagsisilbing coordinating body sa gobyerno, academe, at industriya para bantayan ang mga economic trend at magbigay ng impormasyon tungkol sa employment, unemployment, underemployment at job-skills mismatch.

Kinakailangan rin magkaroon ng inventory, review, at evaluation ng mga kurso at programang akademiko sa publiko at pribadong higher learning institution, suriin ang kwalipikasyon at kakayahan ng mga mag-aaral at nakatapos na at ilista ang job specification at skills requirement ng iba’t ibang industriya.