Hiniling ni Senate Minority Leader Aquilino “Koko” Pimentel III sa Blue Ribbon Committee na imbestigahan ang pagkaantala sa pagbibigay ng national identification card (national ID) ng Philippine Statistics Authority (PSA).
“Given the unreasonably prolonged delivery, questionable usefulness, and substandard quality of the national IDs, there is already cause to believe that there is malfeasance, misfeasance, or nonfeasance on the part of the leadership in the PSA, the BSP (Bangko Sentral ng Pilipinas), and other relevant agencies in fulfilling its mandate under Republic Act No. 11055,” aniya sa paghahain ng Senate Resolution No. 585.
Inihain ni Pimentel ang resolusyon na nag-utos sa Blue Ribbon na magsagawa ng pagsisiyasat sa pagkaantala, na nagdulot ng mga alalahanin tungkol sa pagiging kapaki-pakinabang at substandard na kalidad ng mga ID, na may mga ulat ng hindi tumpak na personal na impormasyon at malabong larawan.
“We are concerned about the delay in the issuance of these cards. It is crucial that the government takes immediate steps to resolve the issue and ensure that all citizens have access to their national ID,” aniya.
“Apart from the delay in meeting the quota for the number of ID cards to be accomplished, there have been complaints about inaccuracy of personal information and blurry images on the cards,” sinabi ng mambabatas.
Ang mga ID ay hindi na rin nababasa pagkatapos ng tatlong buwan, dagdag nito, na ayon din sa mga natuklasan ng Commission on Audit (COA).
Ayon sa COA, sa pagtatapos ng 2021, ang BSP ay naghatid lamang ng 27,356,750 pre-personalized card o 76 porsiyento ng 36 milyong kinakailangang bilang ng mga ID para sa 2021. Ang bilang ay malayo sa 116 milyon mga pre-personalized na ID na kailangang ihatid ng BSP mula 2021 hanggang 2023.
Hinimok din ni Pimentel ang gobyerno na gumawa ng mabilis na aksyon at magbigay ng malinaw na timeline kung kailan maaaring matanggap ng mga Pilipino ang kanilang mga national ID.
Ang PhilSys ay itinatag noong 2018 upang magbigay ng wastong patunay ng pagkakakilanlan para sa lahat ng mamamayan at residenteng dayuhan.
“Maging ang usefulness ng ID ay pinag-uusapan, dahil may ilang financial institution na tumanggi na kilalanin ang national ID dahil kulang ito sa pirma ng may hawak,” ani Pimentel sa resolusyon.