Ipinahayag ni Senador Risa Hontiveros ang kanyang matinding pagkadismaya at panawagan na agad na wakasan ang matagal na pagkakakulong kay dating Senador Leila De Lima.

Ito ay matapos tanggihan ng korte ang petisyon ni De Lima na makapag pyansa.

“Karapatan niya ang isang mabilis na paglilitis, gaya ng nakasaad sa ating Konstitusyon. Nananawagan ako ng agaran at malinaw na resolusyon tungkol dito. Itigil na ang kabulastugang ito. Tigilan na ang pagpapahirap kay Leila.”

“Hindi ko maiwasang isipin ang iba pang kaso diyan na kaagad nalutas, samantalang si Leila, na naglahad ng mga pang-aabuso ng drug war sa ilalim ng administrasyon ni Duterte, ay anim na taon nang nakapiit.”

Kinwestyon din ni Hontiveros ang kredibilidad ng mga testigo laban kay De Lima at nagbabala tungkol sa patuloy na pag-asa ng korte sa mga testimonya mula sa mga “self-serving sources.” 

Aniya, marami sa mga indibiduwal na ito ang bumitiw na sa kanilang mga akusasyon laban kay De Lima, na nangangahulugan na hindi kapani-paniwalang kasinungalingan at panlilinlang ang hinabi ng mga drug lord na sangkot sa kaso.

“Kaya mapapatanong ka na lang: Bakit naiipit pa rin siya sa kasong ito sa kabila ng kasinungalingan ng mga sinasabi nilang mga star witness?”

“Muli, gaya sa nakaraang anim na taon, pareho ang aking panawagan: Tigilan na ang kawalang-puso at walang kamatayang pagkakait ng katarungan kay Leila.”

Sa huli, umapela si Hontiveros sa mga kapwa Pilipino at lahat ng tagapagtaguyod ng karapatang pantao, at hinihimok silang tiyakin na ang hustisya ay hindi lamang limitado sa mga makapangyarihan at may pribilehiyo. 

“Sama-sama nating patunayan na sa Pilipinas, ang katarungan ay para sa lahat, at hindi lang gawa-gawa lamang.”