Muling nananawagan si Senador Win Gatchalian sa Department of Energy (DOE) na ipatupad na ang Energy Virtual One-Stop Shop (EVOSS) system para sa mga prospective investors. 

“Itinulak natin na ma-institutionalize ang EVOSS para mapabilis ang proseso ng pagpapahintulot ng mga generation projects na makakatulong para magkaroon ang bansa ng iba’t-ibang pagkukunan ng enerhiya at maisaayos ang suplay ng enerhiya ng bansa,” saad niya.

Ito ay kasunod ng ulat ng World Wide Fund na nagsasabing ang red tape ay patuloy na humahadlang sa pag-unlad ng renewable energy industry sa bansa.

“Kailangang maipatupad nang maayos ang mga probisyon ng batas dahil ito ang magsisiguro na magkakaroon ang bansa ng sapat na suplay ng enerhiya sa panahon na kailangan natin ito,” giit pa ni Gatchalian.

Sinabi pa niya na upang makaakit ng mga private investors ay kinakailangan ng naaangkop na mga kondisyon ang mga pagsisikap na ginagawa ng gobyerno para sa pag-unlad ng ekonomiya.

Ang Republic Act 11234 o EVOSS Act ay inaasahang magpapabilis ng pamumuhunan ng sektor ng enerhiya. 

“Ang layon ng batas ay bawasan o alisin ang ilang permit at makaakit ng mas maraming mamumuhunan. Kaya, dapat tiyakin ng DOE na lahat ng mga probisyon ng batas ay maipapatupad agad,” dagdag nni Gatchalian.

Siya ay ang kasalukuyang nagsisilbing Vice Chairperson ng Senate Committee on Energy.