Nagdeklara si Pangulong Bongbong Marcos ng giyera laban sa online child sexual abuse at nag-uutos sa mga ahensya ng gobyerno na palawakin ang kanilang mga hakbang sa paglaban sa mga karumal-dumal na krimeng ito.
Sa isang kamakailang pagpupulong sa Malacañang, nagpahayag ng matinding pagkabahala si Marcos sa paglaganap ng online child sexual abuse at binigyang-diin ang pangangailangang puksain ang mga ganitong krimen.
Ang bagong direktiba ng pangulo ay inanunsyo ni Justice Assistant Secretary Jose Dominic Clavano IV na binanggit ang pagkabalisa ni Marcos nang malaman ang tungkol sa kalubhaan ng isyu.
Ang direktiba ni Marcos ay multi-agency approach, kung saan kasama ang Department of the Interior and Local Government, Philippine National Police, National Bureau of Investigation, Department of Social Welfare and Development, at ang Department of Information and Communication Technology. Ang bawat ahensya ay inatasan ng mga partikular na responsibilidad, mula sa pagsubaybay at pagpapatupad hanggang sa pagpapabuti ng mga proseso ng imbestigasyon at pakikipagtulungan sa mga private sector entities.
Nanawagan din ang Pangulo ng pakikipagtulungan ng mga private sector stakeholders, internet service providers, at educational institutions. Binigyang-diin ni Marcos ang kahalagahan ng isang comprehensive strategy upang epektibong labanan ang online child sexual abuse.
Ang Philippine National Police naman ay naghahanda upang tugunan ang emerging threats, kabilang ang paggamit ng Artificial Intelligence sa pagbuo ng mga exploitative materials na nagta-target sa mga bata.
Photo credit: Facebook/pcogovph