Personal na naghatid ng tulong pinansyal at family food packs si Senator Lito Lapid sa mga mangingisda sa Masinloc, Zambales noong Martes, Agosto 1. Ang tulong ay bilang tugon sa hirap na kinakaharap ng fishing community dahil sa sapilitang fishing ban ng China sa West Philippine Sea.

Mahigit 600 mangingisda at tindero sa palengke na apektado ng fishing ban, na nagkabisa noong Hunyo 15, 2024, ang nakatanggap ng tulong at food packs mula sa Department of Social Welfare and Development sa pamamagitan ng inisyatiba ni Lapid.

Binigyan din niya ang bawat benepisyaryo ng karagdagang P3,000 para sa pangangailangan ng kanilang mga pamilya, na umabot sa kabuuang P1 milyon para sa relief efforts sa Masinloc.

“Malaking tulong po ito sa aming mangingisda na nawalan ng hanapbuhay at natatakot po kaming mamalakaya sa Bajo de Masinloc dahil sa banta ng China sa amin, Maraming salamat kay Sen. Lapid dahil sa iyong malasakit at pag-bibigay ng panahon sa aming mahihirap. Hulog ka ng langit sa amin, Supremo!” pahayag ng isa sa mga benepisyaryo.

Ibinahagi ng isa pang benepisyaryo na nahihirapan silang mabuhay dahil sa inflation at kawalan ng kita na bunga ng fishing ban.

“Halos nawalan na kami ng kita. nagdidildil na lang ng asin ang aming pamilya para lang makatawid sa gutom na aming nararanasan. Sana may magawa po ang gobyerno natin na mabawi ng Tsina ang fishing ban at makabalik kami sa Bajo de Masinloc,” dagdag pa ng isang mangingisda.

Buong suporta naman ang ipinahayag ni Mayor Senyang Lim kay Lapid, na aniya’y anak ng labandera at stuntman, isang beteranong aktor, at isang public servant na may malinis na rekord sa nakalipas na 30 taon.

Samantala, nagpahayag ng pasasalamat ang senador sa mainit na pagtanggap sa kanya ng mga taga-Masinloc at tiniyak niya na patuloy siyang magbibigay ng tulong.

Facebook/SenadorLitoLapid