Pinag-aaralan ngayon ng Department of Justice (DOJ) ang posibleng mga “legal consequences” ng mga nakakaalarmang pahayag ni Vice President Sara Duterte, partikular ang kanyang banta na huhukayin ang katawan ni dating Pangulong Ferdinand Marcos Sr. at itatapon ito sa West Philippine Sea.
Ayon kay Justice Secretary Jesus Crispin Remulla, ang binitawang salita ng bise presidente ay “lumabag sa moral principles” at nararapat na siyasatin para sa legal na aspeto nito.
“There are many approaches to that, but it desecrates the memory of a person, it desecrates the peaceful state that he must be in, having already passed away, and it disturb[s] the body,” aniya.
Dagdag pa ng kalihim, “very disturbing” kung ganun ang pag-iisip, lalo na’t mataas ang posisyon na hawak ng taong nagsabi nito.
Ayon pa sa kanya, posibleng isang libel case ang pahayag na ito ni Duterte lalo na’t may elemento ng di-paggalang sa yumao. Ayon sa Article 353 ng Revised Penal Code, sakop ng libelo ang pagkasira ng pangalan o alaala ng isang tao, buhay man o patay.
Sinabi ni Remulla na bagamat wala siyang tinukoy na partikular na probisyon, ang mga pahayag ng bise ay malinaw na taliwas sa moralidad.
Photo credit: Facebook/OfficeOfTheVicePresidentPH, Facebook/DOJPHofficial