Tiniyak ng Malacañang na hindi hinaharang ni Pangulong Ferdinand R. Marcos Jr. ang pagproseso ng impeachment complaints laban kay Pangalawang Pangulo Sara Duterte.
Sa isang press conference sa Pasay City, pinabulaanan ni Executive Secretary Lucas Bersamin ang alegasyon ng Makabayan bloc sa Kamara na ang umano’y “pakikialam” ni Marcos ang dahilan ng pagkaantala ng impeachment proceedings laban kay Duterte.
“He (Marcos) is not blocking. He cannot do that because it is the discretion of the collective of the lower house. If they decide to initiate, there is no way of preventing that,” ani Bersamin.
Ayon kay Bersamin, nagbigay lamang ng opinyon si Marcos ukol sa impeachment complaints ngunit hindi niya idinidikta sa Kamara na ipagpaliban ang pagproseso nito.
Prerogatibo Ng Kamara
Nilinaw ng executive secretary na nasa prerogatibo ng Kamara ang pag-endorso ng impeachment complaints laban kay Duterte.
“You know, that under the Constitution, the impeachment must emanate from the lower house, okay? Now, if the President has made the statement at all, about that process, it is only an opinion that he stated because he probably the thinking of the President is that might be distracting us from our agenda or our move forward,” paliwanag ni Bersamin.
“We cannot dictate on the lower house. It is co-equal, belongs to a co-equal branch of government. All we were saying, the President was saying to the lower house, this is my position,” dagdag pa niya.
‘Poor Timing’ Ng Impeachment Move
Sa isang panayam noong Enero 17 sa Burauen, Leyte, sinabi ni Marcos na hindi praktikal na ituloy ang impeachment laban kay Duterte dahil sa “very poor” timing nito, lalo na’t papalapit na ang mid-term elections ngayong taon.
May tatlong impeachment complaints na nakabinbin laban kay Duterte sa Kamara. Ang mga alegasyon ay kinabibilangan ng paglabag sa Konstitusyon, pagkakanulo sa tiwala ng publiko, plunder at malversation, bribery, graft and corruption, at iba pang mabibigat na krimen.
Noong Nobyembre 2024, binigyang-diin ni Marcos na ang impeachment complaint ay magdudulot lamang ng pagkagambala sa trabaho ng gobyerno, na ang tunay na layunin ay “to improve the lives of all Filipinos.”
Photo credit: Facebook/pcogovph, Facebook/MayorIndaySaraDuterteOfficial