Inaasahan na magiging pangunahing usapin sa nalalapit na eleksyon ang impeachment complaint laban kay Vice President Sara Duterte, ayon kay Senate President Francis Escudero. Aniya, ang usaping ito ay magbibigay ng makabuluhang batayan para sa mga botante upang suriin ang mga kandidato—hindi lang batay sa kanilang personalidad kundi pati na rin sa kanilang plataporma at prinsipyo.
Sa Kapihan sa Senado briefing, mariing sinabi ni Escudero na, “If this shall be an election issue, so be it. Isn’t that a good thing? At least voters will have a valid issue to ask candidates about, particularly for Congress and Senate races. It allows elections to be issue-based rather than personality-based.”
Ayon sa kanya, ang impeachment ay hindi lamang isyu ng administrasyon kundi magiging mahalagang factor sa pagbuo ng desisyon ng 20th Congress na ihahalal sa midterm polls sa Mayo. Malinaw na ang impeachment complaint ay magiging sentro ng diskusyon hindi lamang para sa mga naghahangad na maging kinatawan ng bayan sa Kongreso, kundi pati na rin sa karaniwang mamamayan na nagnanais ng isang makatarungan at isyung nakabatay na eleksyon.
Ngunit may babala rin si Escudero para sa mga kandidato, “So tatanungin ng mga tao: ‘kung iboboto kita, anong boto mo sa impeachment? Di ba? Sa kabilang banda, kailangan maghunos-dili naman din sila kasi bakit pa kami magta-trial kung may desisyon na din sila eh hindi pa naman napapakinggan yung ebidensya?”
Ang pagbibigay-diin sa impeachment bilang isyu ng eleksyon ay nagbubukas ng mas malalim na usapin hinggil sa tamang pamamahala at hustisya. Pinayuhan ni Escudero ang mga senatorial hopefuls na umiwas sa pagmamadali sa pagpapahayag ng kanilang paninindigan sa isyung ito.
“Ang pinakamaganda sigurong pwedeng masabi ay tatayuan nila kung ano ang tama, nararapat, naaayon sa hustisya, batas, at ebidensya kung saan man siya ituro nun.”
Idiniin din niya na ang impeachment process ay isang constitutional mechanism na dinisenyo para resolbahin ang mga alitan sa mapayapang paraan, kaya hindi dapat ikabahala ang mga mamamayan sa posibilidad na maging sanhi ito ng destabilization sa bansa.
Photo credit: Facebook/MayorIndaySaraDuterteOfficial