Nag-trending sa social media si Deputy House Speaker Gloria Arroyo at dating Vice President Leni Robredo matapos kumalat ang kanilang litrato noong Setyembre 6, 2023.
Naglabas naman ng pahayag si Arroyo at kinumpirma na magkasama sila ni Robredo sa isang “social dinner” kung saan kasama rin nila ang iba pang mga kaibigan. Nilanaw rin niya kung ano ang kanilang pinag-usapan.
“I recently had a social dinner with former vice president Leni Robredo and mutual friends from Bicol. We chatted about Bicol politics,” pahayag ni Arroyo.
Ang litrato ay ipinost ni Alita Mercado, ina ni San Pedro Laguna Mayor Art Mercado. Sa kanyang post, makikita na nag-enjoy sila sa nasabing social dinner.
“What a wonderful night with my Kumadres…Judy, Pearl, FPGMA & FVP Leni Robredo,” aniya sa caption ng post.
Halo-halo ang naging reaksyon ng netizen sa kumakalat na larawan. Ang iba ay natuwa sa posibilidad na tandem ng dalawa sa 2028. Ngunit madami rin ang nangangamba at nagsasabing hindi magandang ka-tandem si Arroyo dahil ito ay isang trapo. Gayundin, pina-alalahanan ng mga taga suporta ni Robredo na dapat siyang mag-ingat kay Arroyo.
Samantala, nakasama rin ni Arroyo ang dating Pangulong Rodrigo Duterte kasama sina Senador Bato Dela Rosa, Bong Go, at dating Senate President Tito Sotto ngayong linggo.
Photo credit: Facebook/alita.mercado