Nagpaalala ang Commission on Elections (Comelec) sa mga kandidato ng May 2025 elections na huwag gawing plataporma ng kampanya ang Traslacion o Pista ng Nazareno, na gaganapin sa Huwebes, Enero 9.

Ayon kay Comelec Chairperson George Erwin Garcia, hindi dapat samantalahin ng mga kandidato ang mga religious activities tulad ng Traslacion para sa pangangampanya. Binanggit din niya na may kapangyarihan ang Comelec na magdiskwalipika sa mga lalabag sa kanilang paalala.

“This is just one day compared to the 90 days for the national candidates and 45 days for local candidates to campaign. Let us give this day to the devotees and not take advantage of it,” ani Garcia.

Pista Ng Nazareno: Isang Pambansang Pagdiriwang

Idineklarang pambansang liturgical feast noong nakaraang taon, ang Pista ng Nazareno ay ipagdiriwang na hindi lamang sa Quiapo kundi sa buong bansa. Ayon kay Quiapo Church Rector Father Rufino “Jun” Sescon, ito ang unang pagkakataon na ang Traslacion ay magiging pista ng buong Pilipinas.

Dagdag pa niya, bawat diocese at parokya ay magkakaroon ng kani-kanilang selebrasyon sa araw na ito, ngunit inaasahan pa rin ang malaking bilang ng mga debotong dadagsa sa Quiapo Church at Quirino Grandstand. Noong 2024, mahigit 6.1 milyong deboto ang dumalo sa Pista ng Nazareno.

Pagtitiyak Ng Kaligtasan At Kaayusan

Nanawagan si Manila Mayor Honey Lacuna sa mga deboto na sumunod sa mga patakaran upang masiguro ang kaligtasan ng lahat.

Mga paalala ng alkalde:

• Huwag magsama ng bata o may kapansanan upang maprotektahan sila mula sa posibleng panganib.
• Iwasan ang pagsusuot ng alahas o pagdadala ng mga ipinagbabawal na bagay.

Inatasan din ni Lacuna ang lokal na pamahalaan na tiyaking ligtas ang ruta ng prusisyon. Ayon kay City Engineer Moises Alcantara, masusing ininspeksyon ang ruta upang alisin ang anumang panganib tulad ng hanging wires, potholes, at bukas na manhole.

Bilang dagdag na hakbang, maglalagay ng mga medical teams sa mga pangunahing lugar para magbigay ng agarang tulong medikal kung kinakailangan.