Nagsampa ng criminal complaint si ACT Teachers Party-list Representative France Castro ngayong Martes sa Quezon City Prosecutors Office laban kay dating Pangulong Rodrigo Duterte.
Ang reklamo ay batay sa mga alegasyon ng grave threats sa ilalim ng Article 282 ng Revised Penal Code at Section 6 ng Cybercrime Prevention Act of 2012. Ito ay nag-ugat sa mga pahayag na ginawa ni Duterte sa isang kamakailang programa sa telebisyon tungkol sa confidential fund, matapos magdesisyon ang House of Representatives na i-realign ang P1.23 bilyong pondo ng ilang ahensya ng gobyerno sa ilalim ng proposed 2024 national budget.
Sa isang panayam kamakailan sa SMNI, ipinagtanggol ni Duterte ang paglalaan ng pondo sa Office of the Vice President at Department of Education na parehong nasa ilalim ng pangangasiwa ng kanyang anak na si Vice President Sara Duterte.
Paliwanag niya, “I told Inday (Sara) to be direct, tell them that the intelligence fund is meant to prepare the minds of the Filipinos, to address the insurgency that is takes long time to end. And the ROTC so that we are handa sa digmaan, lalo na sa ganitong sitwasyon, kung wala tayong mga sundalo, magkakaroon tayo ng mga kabataan na kayang mag-alaga sa kani-kanilang barangay.”
Gayunpaman, naglabas ng matinding banta si Duterte laban kay Castro sa parehong panayam. Aniya, “Pero ang iyong unang target doon, gamit ang iyong intelligence funds, ikaw ba, France, kayong mga komunista na gusto kong patayin. Hiniling ko sa kanya na sabihin sa kanila iyon, ngunit tumanggi siya, sinabi, ‘Alam mo Pa, kung ginawa ko. na, baka harass nila ang mga PMT (Philippine Military Training institutions).'”
Bilang tugon, opisyal na inihain ni Castro, kasama ang kanyang legal counsel na sina Tony Laviña at Rico Domingo mula sa Movement Against Disinformation, ang criminal complaint laban kay.
“Na-shock talaga ako sa threat sa aking buhay ni former President Duterte. Tingin natin hinggil ito sa pagbusisi natin sa confidential funds na nagbunga ng pagtatanggal ng confidential funds ng iba’t ibang ahensiya,” paliwanag niya.
Higit pa rito, binigyang-diin ni Castro na wala nang immunity si Duterte nang matapos ang kanyang termino sa pagkapangulo kaya maaari na syang sampahan ng kaso.
“He lost his immunity. Hindi na siya makakapagtago. Dapat matigil na itong gawi ni dating Presidente Duterte. This has to stop,” aniya.
Photo credit: Facebook/rodyduterte
Facebook/ACTteachers