Habang papalapit ang impeachment trial ni Vice President Sara Duterte sa Senado, lumutang ang tanong: Dapat bang umatras ang mga senador na kaalyado niya?

Ayon kay Manila 3rd District Rep. Joel Chua, isa sa 11 mambabatas na magsisilbing prosecutor, seryosong ikinokonsidera ang pag-inhibit ng mga kaalyadong senador.

“We’ll see if that’s possible,” ani Chua sa Saturday News Forum sa Quezon City, patungkol sa mungkahing bumitiw ang mga senador na malapit kay Duterte. “We will wait for our team to convene first and then, we will discuss all the options.”

Delicadeza Ang Labanan

Naniniwala si Chua na may ilan sa mga senador na maaaring kusa nang umatras dahil sa “delicadeza.”

Mahalaga umano ito dahil ang impeachment ay isang numbers game—mas marami ang boto, mas malaki ang tsansang maipatupad ang hatol.

Kabilang sa mga matunog na kaalyado ni Duterte sa Senado sina Senators Ronald Dela Rosa, Christopher Go, Robinhood Padilla, at presidential sister Imee Marcos.

Magbibitiw Ba Si VP Sara?

Isa pang malaking usapin ang posibilidad na magbitiw si Duterte bago pa umusad ang paglilitis. Pero sa kabila ng mga spekulasyon, mariin na niyang itinanggi ang posibilidad ng pagbibitiw.

“At the end of the day, we must respect the process. I trust that our senators will uphold their duty to the Filipino people,” ani Chua.

Pebrero 5 nang ipasa ng Kamara sa Senado ang Articles of Impeachment na pirmado ng 215 mambabatas. Ngunit, bago pa man ito mapag-usapan, nag-adjourn ang Senado hanggang Hunyo 2.

VP Sara, Kumpyansang Handa Na!

Sa kabila ng lahat, tila hindi natitinag si Duterte. Noong Biyernes, masigla siyang humarap sa media ngunit hindi masyadong nagbigay ng detalye tungkol sa impeachment.

Ayon sa kanya, matagal nang handa ang kanyang mga abogado para dito.

Photo credit: Philippine News Agency