Mariing kinondena ng Liberal Party (LP) ang kamakailang pahayag ni dating Presidential Spokesperson Harry Roque na nagdedeklara kay Vice President Sara Duterte bilang bagong pinuno ng oposisyon kasunod ng kanyang pagbibitiw sa kanyang posisyon sa gabinete ni Pangulong Bongbong Marcos.
“Ang tunay na oposisyon, may pundasyon ng accountability, transparency, at pagmamalasakit sa mamamayan – mga bagay na hindi makikita sa track record ni VP Sara,” pahayag ni LP spokesperson at dating senador Leila de Lima.
“Sa kanyang pagbibitiw, wala namang naganap na pag-ako sa responsibilidad, o pagbabago ng mga prinsipyo at paninindigan. Paano naging oposisyon ang may pananagutang hanggang ngayon, sinisingil pa ng taumbayan?” tanong pa niya.
Binigyang-diin ng LP na dapat unahin ng oposisyon ang kapakanan ng mga tao, hindi ang paghahangad ng kapangyarihan o ang proteksyon ng mga vested interest.
“Higit sa lahat: Taumbayan ang inuuna ng oposisyon. Hindi ang pagpapalawak at pagpapanatili sa kapangyarihan. Hindi ang pagtatanggol sa wanted na religious leader o pagpatay sa libu-libong Pilipino. Lalo namang hindi ang pagbubulag-bulagan sa pang-aapi sa ating mga mangingisda at pang-aagaw sa ating teritoryo ng mga dayuhan,” giit ni de Lima.
Ipinunto rin ng partido na ang kamakailang mga pangyayari ay nagsisilbi lamang upang kumpirmahin ang matagal nang pinaghihinalaan ng marami – ang “unity” ng “uniteam” ay walang iba kundi isang taktika sa halalan upang makakuha ng mga boto.
“Ang nangyari kahapon ay pag-amin lamang sa matagal nang alam ng karamihan: na palabas lang ang ‘unity’ ng ‘uniteam.’ Maniobra lamang ito noong panahon ng eleksiyon para makakuha ng suporta ng mga botante. At ngayon, malinaw na may nagaganap na namang bagong pagmamaniobra,” dagdag pa ni de Lima.
Sa huli, hinimok ng LP ang mga nasa kapangyarihan na unahin ang pangangailangan ng mamamayang Pilipino sa gitna ng pagtaas ng presyo, krisis sa edukasyon, at mga banta sa pambansang seguridad.
Photo credit: Facebook/leiladelimaofficial, Facebook/MayorIndaySaraDuterteOfficial