Muling iginiit ni Senador Risa Hontiveros ang kanyang panawagan sa gobyerno na isaalang-alang ang mga kahilingan ng mga manggagawa para sa pagtaas ng sahod at makabuo ng mga epektibong solusyon para mapigilan ang lumalalang inflation o ang bilis ng pagtaas ng presyo ng mga bilihin.
Ginawa niya ang pahayag ngayong Miyerkules matapos tumaas ang inflation sa 8.0 porsiyento noong Nobyembre, mas mataas sa 7.7 porsiyento noong Oktubre, na syang pinakamataas sa loob ng 14 taon.
“Ngayong papalapit na ang Pasko, sana naman ay mapakinggan na ang hiling ng mga manggagawa na umento sa sahod. Ang patuloy na pagtaas ng inflation, ngunit wala namang pagtaas sa sweldo ay lalong nagbabaon sa ating mga kababayan sa kahirapan,” ayon kay Hontiveros.
Sinusuportahan niya ang panawagan para sa pagtaas ng sahod gaya ng nakapaloob sa 5-Point Labor Agenda na itinutulak ng Nagkaisa Labor Coalition at United Labor at nangakong magtatrabaho sa Senado para sa mga reporma sa mga mekanismo sa pagsasaayos ng sahod.
Sinabi rin ng mambabatas na ang iminumungkahing pagtaas ay makatwiran dahil, bukod sa inflation, ang regional tripartite wage at productivity boards ay hindi pa inaprubahan ang productivity-based wage adjustments.
“Most minimum wages are set around the poverty line, but it is undisputed that labor productivity has been going up while real wages have been at the same level for decades now. As production technology is improved, our workers have to work more. Kapag mataas ang productivity, hindi makatarungan na pareho lang ang bayad,” aniya.
Ang sektor ng paggawa, dagdag ni Hontiveros, ay hindi dapat dalhin ang pasanin ng paglaban sa mga krisis sa ekonomiya.
“Kung hindi ito seryosong haharapin ay taghirap na Bagong Taon ang sasalubungin ng ating mga kababayan. Sa tindi ng krisis pang-ekonomiya ngayon, maaari naman sigurong tugunan ng pamahalaan ang hiling na dagdag-umento kahit na mayroong one-year ban para sa adjustment ng sweldo sa bansa,” aniya.
Binigyang-diin ng senador na bukod sa pagtataas ng sahod, dapat maghanap ang gobyerno ng mga paraan upang makontrol ang mataas na inflation rate sa mga sa mga pangunahing gastusin sa bahay tulad ng pagkain at mga kagamitan tulad ng kuryente at tubig upang maiwasan ang karagdagang pagguho ng purchasing power ng mga Pilipino.
“Sa halip na pagtuunan ng pansin ang pagtatatag ng Maharlika Fund na maaari pang makabawas sa pondo ng manggagawa sa SSS (Social Security System) at GSIS (Government Service Insurance System), mas importanteng mabawi ang halagang nawala sa kanila at siguruduhin na abot-kaya ang presyo ng pagkain, kuryente at tubig,” paliwanag niya.
Ang presyo ng kuryente, gas, at iba pang fuel ay tumaas ng 13 percent, na lumampas sa overall inflation rate, partikular na sa labas ng National Capital Region.
“Bilang resulta, ang anumang aksyon na humahantong sa mas mababang gastos sa kuryente ay maaaring magaan ang malupit na epekto ng kabuuang inflation sa antas ng sambahayan,” ayon kay Hontiveros.
Itinulak ni Hontiveros ang ilang mga patakaran para mapababa ang mga gastos sa kuryente sa bansa, kabilang ang pagbawas sa 15 porsyento weighted average cost of capital na pinahihintulutang kolektahin ng mga regulator mula sa mga consumer at ang matagumpay na pagpapatupad ng “least cost” na pagpepresyo na ipinag-uutos ng Epira o ang Electric Power Industry Reform Act of 2001.
Photo Credit: Philippine News Agency website
