Tiniyak ni Senador Risa Hontiveros ang pangako ng Senado na magsagawa ng masusing imbestigasyon sa mga alegasyon laban kay Apollo Quiboloy, sa kabila ng mga hamon at pagtutol ng ilan sa kanyang mga kasamahan.

Sa isang press conference, tinugunan ni Hontiveros ang mga alalahanin ni Senador Robin Padilla tungkol sa pagpapatuloy ng imbestigasyon.

“Well, mabuti kung ipaliliwanag nila ang magiging basis nila. Kasi, wala akong maisip na basis…“ aniya at binigyang-diin na gagawin ng Senate Committee on Women, Children, Family Relations, and Gender Equality ang mga tungkulin nito hanggang sa pagtatapos ng imbestigasyon. Dagdag ng mambabatas, ang mga pagsisiyasat ng Senado ay naging daan para sa katotohanan at katarungan, partikular sa mga biktima ng pang-aabuso at pagsasamantala.

Tungkol sa mga alalahanin ni Padilla tungkol sa malaking gastos ng gobyerno sa mga hearing, binanggit ni Hontiveros ang mga kahalagahan ng investigative role ng Senado.

Binigyang-diin din ni Hontiveros ang tatlong area para sa mga potential legislative amendment batay sa mga natuklasan sa mga pagdinig, kabilang ang pagtugon sa sexual abuse sa loob ng mga religious organization, mga pagkukulang sa labor law, at ang interaction ng mga anti-trafficking law sa religious freedom.

Tungkol naman sa oposisyon ng kanyang mga kasamahan, partikular ang mga may sa personal na relasyon kay Quiboloy, hinimok ni Hontiveros ang kanyang mga kapwa senador na unahin ang mga testimonya ng mga biktima at survivor.

Kabilang sa mga tumututol sa contempt order laban kay Quiboloy ay sina Sen. Padilla, Bong Go, Cynthia Villar, at Imee Marcos.

“Panoorin lang, basahin lang, yung testimonies ng ating mga victim survivors, yung mga babae, yung mga dating menor de edad, na ngayon, after many years, talagang nagbuo ng lakas ng loob, magsalita. At sana, sana, bilang Senado nila, lalo na ngayong buwan ng kababaihan, manindigan po tayo kasama nila,” pahayag niya, at nananawagan para sa pagkakaisa sa pagpapanagot sa mga indibidwal para sa kanilang mga aksyon, anuman ang personal na relasyon nila kay Quiboloy.

Nang tanungin ang tungkol sa potensyal na pagbaligtad ng kanyang desisyon, nanatiling tiwala si Hontiveros sa pangako ng komite na itaguyod ang panuntunan ng batas at tiyakin ang pananagutan ni Quiboloy.

“Kaya patuloy akong nananawagan at patuloy akong umaasa na pagdating ng bukas ay mananatiling nakatayo yung pag-cite ko kay Quiboloy in contempt. Dahil lahat, o kung hindi man lahat, karamihan ng mga miyembro ng komite ko ay maninindigan kasama nung mga victim survivors na iyon.”