Ang tila pag-kambyo ni dating Pangulong Rodrigo Roa Duterte hinggil sa pag-amyenda sa economic provisions ng 1987 Constitution ay maituturing na pagsuporta sa mga hakbang ng Kamara, ayon sa House leaders.
“Natutuwa po ako sa pagbabago ng sentimyento ng dating pangulo kaso lang mas magiging maganda po ito kung pati ang mga sumusuporta sa kanya ay sumalamin din sa posisyon ng dating pangulo,” sinabi ni Deputy Speaker at 2nd District Rep. David “Jay-jay” Suarez sa isang press conference.
Binigyang-diin din niya ang pagtutok ng Kamara sa mga economic provision mula nang maipasa ang sarili nitong bersyon ng RBH 6 noong nakaraang taon.
“Ever since we passed RBH 6 last year it was just purely on economic provisions. We’ve been consistent with the position, the stand, from day one and up until now. Siguro makikita naman ninyo doon sa RBH 7 talagang mirror resolution po ito ng Senado, kaya doon po talaga iikot ang deliberasyon sa economic amendments lamang,” pagdidiin ni Suarez.
Sumang-ayon naman si Taguig 2nd District Rep. Amparo Maria Zamora sa mga pahayag ni Suarez. “That’s exactly what we’ve been saying from the beginning that we’re pushing for Charter change just to push for these economic amendments.”
Binigyang-diin din niya ang kahalagahan ng suporta ni Duterte para sa mga economic Charter amendment, at binanggit na naaayon ito sa mga layunin na itinataguyod ng mga nakaraang Kongreso at ng kasalukuyang 19th Congress.
“So siguro po nakikita na ng ating well-respected former President Rodrigo Duterte ang linaw na ito naman talaga ‘yung matagal na pinu-push ng maraming administrasyon at siyempre ng 19th Congress,” dagdag ni Zamora.
Ikinatuwa rin ni Isabela 6th District Rep. Faustino “Inno” Dy ang pahayag ni Duterte dahil kasabay ito ng deliberasyon ng House Committee of the Whole sa RBH 7.
“Of course, it is a welcome development of former President Duterte supporting [economic] Charter change.
“It’s a very historic day today (Monday) as we’re tackling RBH 7, strictly focusing on the economic provisions,” komento niya.
Sa pamamagitan ng Committee of the Whole deliberations, binigyang-diin ni Dy ang pagkakataon para sa Kamara na tugunan ang mga alalahanin at magkaroon ng produktibong mga talakayan tungkol sa mga pagbabago sa konstitusyon.
Nagpahayag din ng pagsang-ayon si Rizal 4th District Rep. Fidel Nograles, chair ng House Committee on Labor, sa pagbabago ng paninindigan ni Duterte sa Charter amendments.
“Natutuwa rin tayo at nakikiisa tayo sa mga pahayag ng ating dating pangulo sapagkat panahon na upang tingnan natin muli ang ating Saligang Batas, kung paano natin mapapalawak ang investments at maisusulong din natin ang kapakanan ng ating mga manggagawa,” aniya.
Ang tila pagsuporta ni Duterte sa economic Charter amendments ay sumabay sa pagsisimula ng Kamara sa mga deliberasyon sa Resolution of Both Houses No. 7 (RBH 7) sa pamamagitan ng Committee of the Whole.
Sinasalamin ng RBH 7 ang nilalaman ng RBH 6, na kasalukuyang tinatalakay sa Senado, na pangunahing nakatuon sa pag-amyenda sa mga partikular na economic provision sa Charter na nauugnay sa mga serbisyong pampubliko, edukasyon, at advertising.
Photo credit: Facebook/officialpdplabanph
