Inanunsyo ni La Union Governor Rafy Ortega-David ang isang bagong milestone para sa pagpapa-unlad ng agrikultura ng lalawigan matapos niyang lagdaan ang memorandum of agreement kasama ang Department of Agriculture- Philippine Carabao Center (DA-PCC) para sa paglulunsad ng Dairy Box Project sa Cataguingtingan, Rosario, La Union .
“Finally, maproprocess na ng mas mabuti ang La Union produced milk! Malaking tulong po ito sa ating mga carabao owners, as this will serve as their opportunity to sell their freshly produced Carabao Milk Products,” pahayag ni Ortega-David sa kanyang social media page.
Ang Dairy Box ay isang tindahan, na naglalapit sa buffalo-derived products ng mga magsasaka sa merkado. Ito ay inilunsad ng DA-PCC sa Science City of Muñoz, Nueva Ecija noong 2015 at patuloy na dumarami sa buong bansa pagkatapos ng nasabing launching. Nagbibigay ito sa mga may-ari ng kalabaw ng isang plataporma upang maproseso at maibenta ang kanilang mga produkto nang epektibo.
Naniniwala si Ortega-David na ang proyektong ito ay hindi lamang pakikinabangan ng mga lokal na magsasaka kundi makakatulong din sa layunin ng lalawigan na maging Heart of Agri-Tourism in Northern Luzon pagdating ng 2025.
Sa kanyang unang State of the Province Address, sinabi ng gobernador na upang makamit ang layuning ito, pinalalakas ng lalawigan ang sektor ng agrikultura.
Sa mga nagdaang taon, nakita rin ng La Union ang kapansin-pansing pag-unlad sa sektor ng turismo nito matapos ang pandemya. Nakatanggap ang lalawigan ng mga pangunahing pagkilala at nagho-host pa ng World Surfing League, na nagpoposisyon dito bilang isang nangungunang destinasyon sa surfing at water sports sa bansa. Muli ring pinagtibay ng La Union ang pakikipagtulungan nito sa karatig Ilocos Norte sa pamamagitan ng “I’m IN LUv” tourism campaign.
Ipinagmalaki rin ni Ortega-David na ang La Union ay ang ika-11 Most Competitive Province sa bansa at numero 1 sa Northern Luzon at Region 1. Binigyang-diin niya ang kahalagahan ng micro, small, and medium enterprises sa paglago ng ekonomiya ng lalawigan. Inilunsad din kamakailan ng La Union ang kauna-unahang “KayaCon! Agri-Tourism and Elyupreneurs Start-Up.”
Photo credit: Facebook/GovRafy
