Tiniyak ni Pangulong Ferdinand R. Marcos Jr. sa publiko na hindi titigil ang gobyerno upang tugunan ang mga apektado ng kamakailang mga insidente ng oil spill sa Bataan, at nangangakong papanagutin ang lahat ng mga responsable rito.

“Sa ngayon, iniimbestigahan na natin ang paglubog ng mga barko upang makakalap tayo ng sapat na impormasyon [at] mapanagot ang nagkasala ayon sa batas,” aniya habang namamahagi ng tulong pinansyal sa mga residenteng apektado ng oil spill sa Cavite.

Pinangunahan ng Pangulo ang pamamahagi ng mahigit P363 milyon sa mahigit 33,000 mangingisda at kanilang mga pamilya na ang mga kabuhayan ay lubhang naapektuhan ng kalamidad.

Tatlong magkakahiwalay na maritime incident ang naganap sa Bataan noong huling bahagi ng Hulyo, kung saan dawit ang Motor Tanker (MTKR) Terranova, MTKR Jason Bradley, at MTKR Mirola 1. Ang mga oil spill ay nagdulot ng malaking pinsala sa marine ecosystem at sa mga kabuhayan ng mga coastal community.

Iniulat din ni Marcos na nagsimula na ang oil recovery operations para sa MTKR Terranova, at matagumpay nilang napigilan ang karagdagang pagtagas ng langis mula sa barko.

“Masaya akong ibalita na matagumpay na nating napigilan ang pagtagas ng langis mula sa mga barkong ito, partikular yung Terranova, nang hindi na ito makapinsala sa ating kalikasan,” aniya.

Para sa MTKR Jason Bradley, nagpapatuloy ang pagkukumpuni sa manhole at air vents bilang paghahanda sa mga refloating operations, habang isinasagawa ang seawater siphoning para sa MTKR Mirola 1.

Tiniyak din ni Marcos sa mga apektadong residente ang patuloy na suporta at tulong ng pamahalaan.

“Mga kababayan, kasabay ng pagbibigay namin ng tulong sa mga komunidad, asahan din po ninyo na patuloy ang inyong pamahalaan sa paghahanap ng solusyon sa mga problemang dinulot ng pangyayaring ito,” dagdag niya. 

Photo credit: Facebook/coastguardph