Lakas loob na naghatid-sundo ng mga pasyenteng may COVID-19 si Malangas Mayor Marcelo Baquial Jr. para makapagpahinga ang isang ambulance driver na humigit kumulang 24 oras nang naka-duty.

Mula sa kanilang tahanan, hinatid ng mayor ang mga COVID-19 patients patungo sa isolation facility sa Malangas, Zamboanga Sibugay.

Bagamat umani ito ng papuri mula sa netizens, mayroon din namang pumuna sa kanya at nagsabing baka kaya niya ginagawa ito ay dahil malapit na ang eleksyon.

Depensa naman ng head ng Municipal Disaster Risk Reduction Management Office (MDRMMO) na si Atty. Joie Luza, nakasanayan na nila ang estilo ng mayor na tumulong sa gawain ng ibang empleyado.

Bukod sa pagtugon bilang ambulance driver noong Linggo, namataan ding naglilinis ng kalsada at tumutulong sa construction projects si Baquial.

Ayon sa datos ng MDRMMO, walong tao ang nag-positibo sa COVID-19 sa Malangas. Lahat ng residente na inihatid-sundo ng Mayor ay nakarating nang ligtas sa kanilang mga bahay.

Photo Credit: Facebook/jerryelentorio