Nanawagan si Senador Cynthia Villar para sa agarang pagpapalabas ng FDA-approved African Swine Fever (ASF) vaccine upang labanan ang patuloy na outbreak na sumira sa lokal na industriya ng baboy.
Sa pagdinig ng Senado noong Setyembre 9, nagpahayag ng pagkadismaya si Villar, chair ng Senate committee on agriculture and food, sa aniya ay mabagal at hindi epektibong pagtugon ng Department of Agriculture-Bureau of Animal Industry (DA-BAI) sa krisis. Binigyang-diin niya ang agarang pangangailangan para sa isang bakuna bilang isang pangmatagalang solusyon sa epidemya ng ASF.
“The public hearing brought together key stakeholders from the agriculture sector–government agencies, mayors of affected municipalities, private sector, and affected farmers–to discuss urgent measures aimed at halting the spread of the disease,” ani Villar.
Ang ASF outbreak sa Lobo, Batangas, na unang iniulat noong Hulyo 2024, ay nagresulta sa malaking pagkalugi para sa mga hog farmers. Nitong Setyembre, 472 na barangay sa 14 na rehiyon ang classified bilang “red zones” dahil sa mataas na bilang ng mga apektadong lugar.
Ipinunto ni Villar na maaaring mabawasan ang pagkalat ng ASF sa pamamagitan ng mas epektibong border control system at pagkakaroon ng mga bakunang inaprubahan ng FDA. Sinabi naman ni Dr. Samuel Zacate, Direktor Heneral ng FDA, na apat na bakuna ang kasalukuyang sumasailalim sa mga lokal na clinical trial.
Hinimok ni Senador Villar ang DA na pabilisin ang proseso ng pagkuha ng FDA approval para sa mga bakunang ito, at binigyang diin ang kritikal na papel na maaari nilang gampanan sa pagprotekta sa industriya ng baboy sa bansa mula sa karagdagang pinsala.
Photo credit: Department of Agriculture website