Prayoridad ng administrasyong Marcos ang pagtulong sa mga mahihirap na apektado ng pagtaas ng presyo ng mga bilihin, ayon kay Socioeconomic Planning Secretary Arsenio Balisacan, ayon sa ulat ng Philippine News Agency.

“Doon sa mga vulnerable talaga tayo naka-focus ngayon kaya dinadalian namin ‘yung mga issues constraining ‘yung digitalization natin kasi ‘yun ang makakatulong sa pag-ensure na ‘yung limited assistance natin ay makakarating talaga sa mga dapat matulungan,” sinabi ni Balisacan. 

Noong Enero 2023, tumaas ang inflation rate ng bansa nang 8.7 percent mula sa 8.1 percent noong Disyembre 2022, ayon sa report ng Philippine Statistics Authority (PSA). 

Ang pagtaas ng inflation rate ng bansa ay dahil sa pagtaas ng housing rentals, kuryente, tubig, at presyo ng gulay, gatas, itlog, prutas at mani.

“For those naman na talagang affected adversely, lalo na ‘yung mga very poor at vulnerable groups, ‘yun talaga ang pagbuhusan natin ng assistance,” tugon ni Balisacan nang tanungin siya tungkol sa aksyon ng Senado na magbigay ng one-time P50,000 inflation assistance sa mga empleyado nito.

Inanunsyo ni Senate President Juan Miguel Zubiri ang pagtaas ng one-time inflationary allowance ng P50,000 upang makatulong laban sa pagtaas ng mga bilihin.

Photo credit: Philippine News Agency Official website