Sinang-ayunan ni BHW Partylist Representative Angelica Natasha Co ang mungkahing paglipat ng Philippine Health Insurance Corp. (PhilHealth) sa Office of the President (OP).
“I agree with the proposed transfer of PhilHealth to the Office of the President because this move could improve accountability, processes, and performance at PhilHealth,” aniya sa isang pahayag.
Ayon kay Co, wala pang nakikitang malinaw at epektibong solusyon mula sa PhilHealth hinggil sa korapsyon, maliban sa karaniwang paglilipat ng mga sangkot na opisyal at tauhan. Dagdag pa niya, kailangan ang forensic financial audits upang matuklasan ang korapsyon at sabwatan na malalim nang nakabaon sa sistema at field operations ng PhilHealth.
Iginiit din niya na wala pang nakikita na criminal prosecutions at convictions na nagresulta sa maraming imbestigasyon at paglalantad, at nakakalusot ang mga tiwali sa kanilang karumal-dumal na gawain. Hindi napaparusahan ang mga nagsasabwatan, habang tangay ang bilyon-bilyong public at private funds sa pamamagitan ng kanilang organized scams.
Isa pang inaasahan ng mambabatas na maidudulot ng paglipat ng ahensya sa Malacañang ay ang mga bagong package para sa mga senior citizens, persons with disabilities, persons with special needs, at mga atleta, anuman ang edad.
Photo credit: Facebook/PhilHealthOfficial
