Sinabi ni Speaker Martin G. Romualdez ngayong Biyernes na tinaasan ng House of Representatives ang halagang nakalaan mula sa kita ng Maharlika Investment Fund (MIF) para sa social welfare purposes o ayuda mula 20 porsiyento hanggang 25 porsiyento bilang iminungkahi ng isang mambabatas ng oposisyon.
Noong Huwebes ng gabi, naprubahan ng Kamara ang House Bill (HB) No. 6608, na nagtatatag sa MIF, sa botong 279 pabor, 6 laban, at walang abstention. Sinertipikahan ni Pangulong Ferdinand “Bongbong” R. Marcos Jr. ang panukalang batas bilang “urgent.”
Ang MIF ay idinisenyo upang maging isang makapangyarihang kasangkapan para sa pagpapatupad at pagpapanatili ng mga proyektong pang-imprastraktura, mga programa para sa kaunlaran sa kalunsuran at kanayunan, tulong sa agrikultura, at iba pang mga hakbangin na magpapataas ng kita at aktibidad sa ekonomiya sa bansa.
“We have increased the contributions of the profits of the Maharlika Investment Fund to social welfare fund that the government can utilize to provide assistance to those who need it the most,” ani Romualdez sa isang pahayag.
Nabanggit niya na ang grupo ng oposisyon sa Kamara ay nagmungkahi ng naturang pagtaas, kahit na sa huli ay bumoto sila laban sa pagpasa ng HB 6608.
“This amendment was proposed by the Makabayan bloc, which we accepted,” dagdag ng mambabatas.
Sa kanyang mensahe sa mga kapwa mambabatas bago mag-adjourn ang Kamara para sa Christmas break, binanggit niya na ang pag-apruba ng HB 6608 ay dumating matapos ang mga pampublikong konsultasyon at kumpletong deliberasyon sa mga ahensya at stakeholder ay ginawa sa antas ng komite.
Sinabi ng Speaker, “At the Plenary, several interpellators, and numerous hours of session were devoted to informative debates and manifestations discussing lengthily the nature, scope, and benefits of the proposed measure.”
Orihinal na itinalaga ng HB 6608 ang 20% ng mga kita ng MIF para sa mga layunin ng kapakanang panlipunan. Ang mambabatas ng oposisyon na si ACT Party-list Rep. France Castro ay nagmungkahi ng isang amendment upang taasan ang halaga sa 30 porsiyento hanggang sa tuluyang maabot ang kompromiso upang i-peg ang pagtaas sa 25 porsiyento.
Ang HB 6608 ay nag-uutos na hindi bababa sa dalawampu’t limang porsyento (25%) ng netong kita ng Maharlika Investment Corporation —ang independiyenteng katawan na mangangasiwa sa MIF — ay dapat na agad na ipamahagi bilang ayuda ibaba ng poverty threshold na itinakda ng Philippine Statistics Authority bilang kapalit ng mga buwis at dibidendo na ni-reremit sa national government.
Photo credit: Facebook/HouseofRepsPH
