Binatikos ni Senador Raffy Tulfo ang Ambassador ng Tsina sa Pilipinas na si Huang Xilian dahil sa banta nito tungkol sa employment ng mga overseas Filipino workers (OFW) kapag hindi tinutulan ng Pilipinas ang kalayaan ng Taiwan.

Sa isang pahayag, tinawag ni Tulfo na bully si Huang at hindi umano nakuntento sa harassment sa mga mangingisdang Pilipino sa West Philippine Sea at ngayon naman ay ginagamit ang mga OFW sa isyu nito sa Taiwan sa Enhanced Defense Cooperation Agreement (EDCA).

“Si Chinese Ambassador to the Philippines Huang Xilian ay nagbitaw ng mga salitang lantarang minamaliit ang mga Pilipino nang dahil sa away ng China at Taiwan. Ginamit niya sa kanyang pambubully ang inosente nating mga OFWs sa Taiwan para utusan tayong gawin ang mga kagustuhan nila,” aniya.

“To Chinese Ambassador Huang Xilian, this is not acceptable, and we will never bow down to this kind of bullying! Sa mga kababayan natin sa Taiwan, huwag po kayong mabahala. Hinding-hindi po namin kayo pababayaan,” dagdag ng mambabatas.

Kamakailan, nagpahayag si Huang tungkol sa isyu sa kalayaan ng Taiwan. Sabi niya, “The Philippines is advised to unequivocally oppose ‘Taiwan independence’ rather than stoking the fire by offering the US access to the military bases near the Taiwan Strait if you care genuinely about the 150,000 OFWs.”

Idiniin ni Tulfo na walang karapatan ang sinuman na utusan ang Pilipinas sa dapat nitong gawin at magbanta pa sa mga OFW.

Dagdag pa niya, ang isyu ng Tsina sa Taiwan o sa EDCA ay dapat hinarap sa pamamagitan ng diplomasya na sumusunod sa tamang proseso at protocol. 

Sinabi rin ni Tulfo na matagal nang foreign ministry officer ng China si Huang, pero dinamay pa niya ang mga OFW sa kanyang pananakot sa halip na makipag-ugnayan sa gobyerno.

Photo credit: Facebook/SenatePH