Aminado si Manila Mayor Honey Lacuna na hindi na siya nagulat sa Octa Research survey na nagpakitang may malaking tsansa na manalo nang landslide si Francisco “Isko Moreno” Domagoso sa darating na 2025 elections.
Ayon sa survey noong Hulyo, si Domagoso ay makakakuha umano ng 86 percent ng boto, habang si Lacuna ay makakapuwesto lamang sa 8 percent.
“Well, I’m not surprised. Alam naman natin na national figure na si Isko,” sabi ni Lacuna sa panayam sa ANC. Ipinunto niya na naging kilala na si Domagoso sa buong bansa matapos tumakbo sa mga pambansang posisyon — Senado noong 2016 at pagkapangulo noong 2022.
Matapos mabigo sa kanyang senatorial bid noong 2016 kung saan siya nagtapos sa ika-16 na puwesto, bumawi si Domagoso nang mahalal bilang alkalde ng Maynila noong 2019, kasama si Lacuna bilang kanyang running mate.
Tumakbo siya sa pagkapangulo noong 2022 ngunit nagtapos siya sa ika-4 na puwesto.
Ayon kay Lacuna, ipinagpatuloy niya ang mga proyektong nasimulan ni Domagoso — mula sa pagtatayo ng mga bagong silid-aralan hanggang sa mga healthcare facilities. Gayunpaman, binigyang-diin niyang mas tumutok siya sa mga social amelioration projects tulad ng pamamahagi ng ayuda.
Inamin din ni Lacuna na kahit tumanggap na siya ng mga parangal para sa good governance, kulang ang kanyang opisina pagdating sa publicity at social media presence — isang bagay na tila kalakasan ni Isko.
“Unfortunately, doon po kami kulang. Alam naman natin na napakagaling ng former mayor d’yan,” dagdag niya.
Photo credit: Facebook/iskomorenodomagoso, Facebook/ManilaPIO