Nagpahayag ng buong suporta si dating pangulong Rodrigo Duterte sa kanyang anak na si Vice President Sara Duterte, kaugnay ng tatlong impeachment complaints na isinampa laban dito. Tumanggi si VP Duterte sa alok na pinansyal na tulong mula sa kanyang ama para sa kanyang legal na laban, ngunit nagboluntaryo naman ang dating pangulo na maging bahagi ng kanyang legal team.

“Sinabi niya na since hindi ko tatanggapin ang pera, siya na ang mag-aabogado para sa akin,” ayon sa bise.

Kasalukuyang inihahanda ni Rodrigo Duterte ang kanyang mga dokumento sa Integrated Bar of the Philippines (IBP) upang maging collaborating counsel.

Mga Isyu Na Nakapaloob Sa Impeachment Complaints

Ang mga reklamo laban kay Vice President Duterte ay umiikot sa sumusunod:

• Paglabag umano sa 1987 Constitution mula noong alkalde pa siya ng Davao City hanggang sa pagiging bise presidente.
• Maling paggamit ng confidential funds at betrayal of public trust dahil sa pagtangging makipagtulungan sa congressional inquiries.
• Misappropriation ng confidential funds noong siya ay kalihim ng Department of Education (DepEd).

Sinabi ni VP Duterte na matibay ang kanyang depensa at kumpiyansa siyang hindi siya lumabag sa batas.

Proseso Ng Impeachment Para Kay VP Sara Duterte

1. House of Representatives: Ang Kamara ang magdedesisyon kung may probable cause. Kakailanganin ng boto mula sa one-third ng mga miyembro upang maisulong ang kaso.
2. Senado: Magiging impeachment court ang Senado, kung saan kailangang makakuha ng two-thirds vote para mahatulan ang opisyal.

Gayunpaman, hindi pa matukoy ang suporta para kay VP Duterte sa Kamara matapos ang tensyon kaugnay ng kanyang budget proposal. Sa Senado, tiyak ang suporta mula kina Senators Ronald dela Rosa, Bong Go, Robin Padilla, at Imee Marcos, ngunit nananatiling alanganin ang iba pang senador.

Photo credit: Facebook/officialpdplabanph