Binigyang-diin ni Senator Raffy Tulfo na dapat ay may sapat na plano ang gobyerno para matiyak na maayos ang kondisyon ng mga resettlement area na paglilipatan ng informal settler families (ISFs).

Inilarawan niya ang kalunos-lunos na kalagayan ng mga mahihirap na ini-relocate sa mga lugar na walang kuryente o linya ng tubig, walang maayos na kalsada, at sira-sirang bahay habang kausap ang National Housing Authority (NHA) at Department of Human Settlements and Urban Development (DSHUD) sa hearing ng Senate Committee on Urban Planning, Housing and Resettlement.

“May mga reklamo akong natatanggap mula sa mga mahihirap nating mga kababayan na ang mga bahay na pinaglipatan sa kanila ay walang kuryente, walang tubig, hindi maayos ang sewage system, sira-sira ang dingding, tumutulo ang bubong at malamok.”

Hindi tinatrato nang maayos ang mga ISF sa ibinibigay sa kanilang bahay ng gobyerno. Paglalarawan ni Tulfo: “Minsan mas mabuti pa nga ang mga tangkal ng mga baboy: may kuryente, may tubig, may tamang ventilation. Ang mga tao sa mga resettlement areas, kawawang-kawawa,” aniya.

Ibinahagi ng mambabatas ang suhestiyon na tanggalin na ang minimum na bilang ng tao na kinakailangan ng mga utility company bago magkabit ng linya ng tubig o kuryente. Aniya, ito ang dahilan kung bakit hindi makabitan ng linya ang ilang mga komunidad.

Dagdag ni Tulfo, malayo pa ang nilalakad ng mga residente bago makasakay sa mga pampublikong transportasyon. “Inhabitants, especially students, would still have to walk for one to two kms before having access to mass transportation.”

Maglagay din ng mga barangay at police outpost sa mga resettlement area upang matiyak ang kaayusan at matigil ang mga krimen sa komunidad, aniya.

Iminungkahi naman ng senador na gamitin ang National ID system para para madaling makilala ang mga ISF at professional squatter na sinasamantala ang government housing program.

Aniya, may mga propesyonal na squatter na nagbebenta ng ari-arian na iginawad sa kanila bago maghanap nanaman ng ibang malilipatan na tirahan.

Photo Credit: Facebook/OfficialNHA