Matigas ang paninindigan ni Senate Deputy Minority Leader Risa Hontiveros na dapat nang umusad ang impeachment trial laban kay Vice President Sara Duterte, iginiit niyang walang dahilan para patagalin pa ito.
Sa Kapihan sa Senado forum nitong Miyerkules, kinatigan ni Hontiveros ang pahayag ni Senate Minority Leader Aquilino “Koko” Pimentel III na dapat agad umaksyon ang Senado sa impeachment articles na isinampa ng Kamara.
“Walang pumipigil sa amin na i-tackle yung articles of impeachment at mag-constitute bilang impeachment court,” diin ni Hontiveros, na binigyang-diin ang tungkulin ng Senado na magsagawa ng paglilitis nang hiwalay sa anumang legal na hamon sa Korte Suprema.
Escudero: Hintayin Ang Hunyo? Hontiveros: Bakit Pa?
Bagamat sinabi ni Senate President Francis Escudero na maaaring sa Hunyo pa umusad ang pagdinig matapos ang legislative break, hindi ito sinang-ayunan ni Hontiveros. Ayon sa kanya, hindi kailangang maghintay ng apat na buwan dahil baka lalo lang itong magdulot ng pagkaantala sa hustisya.
Suportado naman niya ang planong caucus ng mga senador upang pag-usapan ang proseso, pero umaasa siyang ikokonsidera ng kanyang mga kasamahan ang argumento ni Pimentel na hindi nakatali sa legislative calendar ang impeachment trial.
“Sana dun sa caucus na yun, mapakinggan ng aming mga kasama ang mga argumento ni Senator Koko (Pimentel) kung bakit di lamang pwede kundi dapat mag-convene na kami bilang impeachment court para i-treat, i-tackle yung articles of impeachment,” aniya.
‘Walang Kinalaman Ang Pulitika Sa Impeachment’
Dahil nalalapit na ang midterm elections, may haka-haka na maaaring umiwas ang mga reelectionist senators sa impeachment trial upang hindi maapektuhan ang kanilang kandidatura. Pero ayon kay Hontiveros, hindi dapat maging sagabal ang politika sa pagsunod sa konstitusyon.
Ang impeachment ay hindi lang tungkol sa politika. Ito ay tungkol sa pananagutan at transparency, aniya.
Bagamat aminadong may opinyon na siya ukol sa mga isyu kay VP Sara, tiniyak ni Hontiveros na magiging patas siya sa impeachment trial.
“Siyempre, nobody can completely divorce oneself or forget what has happened. At kahit yung mga nasa social media, syempre, resibo yun sa aming lahat. But the point is, as has been done by senators before and Senate before sa mga previous impeachment trials, yun yung hamon sa aming lahat at hamon din sa akin — to have that frame of mind na, okay, as if nagsisimula sa simula,” paliwanag niya.
Habang naghihintay pa ang Senado sa ruling ng SC kaugnay sa impeachment petitions, iginiit ni Hontiveros na hindi dapat nakaasa ang Senado sa hudikatura at dapat itong umaksyon nang may kalayaan.
Kung matuloy ang impeachment trial, maaaring humantong ito sa pagpapatalsik kay VP Sara at sa kanyang permanenteng diskwalipikasyon sa anumang pampublikong posisyon. Ito ang senaryong kinikilala ni Hontiveros na may malawakang epekto sa politika ng bansa.
Photo credit: Facebook/hontiverosrisa